(କବିସୂର୍ଯ୍ୟ— ରାଗ ବିଲାହାରୀ, ତାଳ ଆଦିତାଳ)
ଖଞ୍ଜରୀଟ ନୟନା ଅଳପେ ଚାହାଁରେ । ଘୋଷା ।
ଅଞ୍ଜନରୁଚି ମଦଗଞ୍ଜନ କେଶା
କଞ୍ଜସୁନ୍ଦର ମୁଖରଞ୍ଜନ ବେଶା
ସଞ୍ଜ କୁମୁଦ ସମ ହାସବିଳାସା
ତୁ ସିନା ସାହା ରେ । ୧ ।
ଦନ୍ତବସନ ରୁଚି ସନ୍ତତ ଚାଖି
ସନ୍ତତ ତବ ତନୁ କାନ୍ତିରେ ଲାଖି
କାହିଁ ଭରସି ରସି ନାହିଁ ମୋ ଆଖି
ତୋହର ବାହାରେ । ୨ ।
ବାରଣବର ଗମନା ରସକାରା
ପରିଚିତ ରଣରଣ ଧରଣୀ ବିହାରା
ରଚ ବଚନାମୃତ ନିର୍ଗତ ଧାରା
ମିଶ ହୃଦ ହାରେ । ୩ ।
ଚଣ୍ଡମଦନକର ଦାରୁଣ ବାଣେ
ଦଣ୍ଡକୁ ସମୁଚିତ ନୁହଇ ମୁଁ ଟାଣେ
ମଣ୍ଡ ଗଳକୁ କହେ ଅଗଣିତ ରାଣେ
ମୃଦୁଳ ବାହାରେ । ୪ ।
ମଗ୍ନ ମୁଁ ତୋର ରସ ନିର୍ଝର କୂପେ
ତନୁରୁଚି ନିର୍ଧୂତ ହାଟକ ରୂପେ
ସକରୁଣ ହୁଅ ହରିଚନ୍ଦନ ଭୂପେ
ମୋ ସୁଖରାହା ରେ । ୫ ।