(କବିସୂର୍ଯ୍ୟ— ରାଗ ସାରଙ୍ଗ, ତାଳ ଆଦିତାଳ)
ଚନ୍ଦନବାସି କୁନ୍ଦବରହାସୀ ରେ । ଘୋଷା ।
କରୁଣାମୟ ବରୁଣାଳୟହୃଦୟା ଘନକେଶୀ ରେ
ପରାପତ ତୁ ତେ ହେଲୁ ପରା ନିରତେ
ହରାଙ୍ଘ୍ରି ଭଜନରୁ କାଶୀ ରେ । ୧ ।
ଶରଣାଙ୍କିତ ଅରୁଣାମ୍ବୁଜଚରଣା ମୃଦୁଭାଷୀ ରେ
ଧରାତରୁଣୀଶିରଝରାରତନ ମତେ
କରା ଆଜ ତୋ ନିଜ ଦାସୀ ରେ । ୨ ।
ମଦନେଷୂଜକଦନେ ନିରତ ସଖି ଗଲି ଭାସି ରେ
ତରୀ ପରି ଅଙ୍କରେ କରି ନିବିଡ଼ତରେ
ପରିରମ୍ଭରେ ରଖ ଆସି ରେ । ୩ ।
ଲଳନାବର ତୁଳନା ପରିକଳନା ଗୁଣରାଶି ରେ
ଅନା ଅନା ଚପଳା ନୟନାନ୍ତରେ ତୁ ରେ
ମଦନାହବକୁ ଫରମାସି ରେ । ୪ ।
କରି ବନ୍ଦନ ହରିଚନ୍ଦନ କହେ କୁଞ୍ଜବିଳାସୀ ରେ
ରୁଷା ବରଜି ମୃଗଦୃଶା ପଡ଼ିଲେ
ମୃଦୁ ମସାରନିଭ ଭୁଜପାଶିରେ । ୫ ।