(କବିସୂର୍ଯ୍ୟ— ଖେମଟା)
ବାରିଜାକ୍ଷୀ ମନରୁ ମାନ ବାରି ଦେ ରେ
ଦେଖ କାଳ ହେଲା କଳା ବାରିଦେ ରେ । ଘୋଷା ।
ଦାସ ନାଶରେ ମାନସ । ବଳିଛି ଯେବେ ନାରୀଶ ।
କରଜ ନାରାଚ ମାରି ଚିରି ଦେ ରେ । ୧ ।
ତୋ ଚରଣ ସେବା ଭଳି । ନୋହିଲି ଯେବେ ରେ ଆଳି ।
ଗାଳି ଦିଆଇ ମହତ ସାରି ଦେ ରେ । ୨ ।
ଏବେ ବନ୍ଧୁ ଅନାଥରେ । ଦୟା ଥିଲେ ଅନା ଥରେ ।
କରୁଣା କଟାକ୍ଷ ନେତ୍ରେ ଠାରି ଦେ ରେ । ୩ ।
ମହିଳାମଣି ଜଗତେ । ତୋ ବିନା ସାହା କେ ମୋତେ ।
ମାର ମୁଖୁଁ ବଞ୍ଚାଇବି ଗାରି ଦେ ରେ । ୪ ।
ଦ୍ୱିଜ କବିରବି ବାଣୀ । ଶୁଣି ସେ ରମଣୀମଣି ।
ସ୍ନେହେ ଦ୍ରବି ବହିଗଲା ବାରି ଦେରେ । ୫ ।