(କବିସୂର୍ଯ୍ୟ— ରାଗ ଖମ୍ବାଜ, ତାଳ ରୂପକ)
ମାନ ସୁମନା
କରିଦେ ମାନସୁଁ ମନା ରେ । ଘୋଷା ।
ଗିରିସମ ଜାଇ ରେ ରାମା । ଗିରିସମ ଜାଇ ।
ଦେଇ ମୁଁ ପାଇଛି ତୋତେ ଗିରୀଶ ମଜ୍ଜାଇ । ୧ ।
ନାଗରାଜ ଗତେ ରେ ରାମା । ନାଗରାଜ ଗତେ ।
ମୁଁ ତୋର ବୋଲି ବାଜୁଛି ନାଗରା ଜଗତେ । ୨ ।
ତୋର ପରିକର ରେ ରାମା । ତୋର ପରିକର ।
ଆଜି ସିନା ରତେ ମୋତେ ତୋର ପରି କର । ୩ ।
ଫୁଟିଲେ ନିଆଳି ରେ ରାମା । ଫୁଟିଲେ ନିଆଳି ।
ଜଳପି ଜଳପି ତୋତେ ଫୁଟିଲେନି ଆଳି । ୪ ।
ରମ୍ଭାଉରୁ ବସି ରେ ରାମା । ରମ୍ଭାଉରୁ ବସି ।
ଅଙ୍କେ ଥିଲେ ନ ଗଣେ ମୁଁ ରମ୍ଭା ଉରୁବଶୀ । ୫ ।
ନବ ସୁରସା ରେ ରାମା । ନବ ସୁରସା ।
ତୁ ପରା ମୋ ଅଙ୍କ ବିନା ନ ବସୁ ରସାରେ । ୬ ।
ହରିଚନ୍ଦନକୁ ରେ ରାମା । ହରିଚନ୍ଦନକୁ ।
ଘେନ ଯଥା ବସନ୍ତରେ ହରି ଚନ୍ଦନକୁ । ୭ ।