(କବିସୂର୍ଯ୍ୟ— ଆଡ଼ତାଳି)
ସଖି ଚାହିଁଛି ମାତ୍ର ଶିଖଣ୍ଡ ଲୋ । ଘୋଷା ।
ତୁଚ୍ଛା ଅପବାଦେ ଚମକି ପଡ଼ିଛି
ଏ ବ୍ରଜବଜାର ଦାଣ୍ଡ ଲୋ । ୧ ।
ଚିକ୍କଣ ଶ୍ୟାମଳଚନ୍ଦ୍ର ନିକଟକୁ
ଚାଳି ନାହିଁଟି ପହଣ୍ଡ ଲୋ । ୨ ।
ଚୋରି ଯେବେ କରିଥିଲି ମୁଁ ତାଙ୍କରି
ଚୁମ୍ବିଛି କି ଚାରୁ ଗଣ୍ଡ ଲୋ । ୩ ।
ଚେଟୀ ହେଲେ ତାର ବରଷନ୍ତା ମୋର
କ୍ଷୀର ଉପରେ ତ ଖଣ୍ଡ ଲୋ । ୪ ।
ଚଳୁଆଟି ବଡ଼ ମୋ ଘର ଗଉଡ଼
ଶୁଣିଲେ ହେବ ପ୍ରଚଣ୍ଡ ଲୋ । ୫ ।
ଚପରାସି ଚୟ ପେଷି କଂସରାୟ
ନିର୍ଦ୍ଦୋଷେ ନେବ କି ତଣ୍ଡ ଲୋ । ୬ ।
ଅଷ୍ଟଦୁର୍ଗେଶ୍ୱର ଭକ୍ତି ନତଶିର
ଶ୍ୟାମ ପଦକଞ୍ଜେ ମଣ୍ଡ ଲୋ । ୭ ।