(ଗୌରହରି— ରାଗ ବିଚିତ୍ର କାମୋଦୀ, ତାଳ ଆଡ଼ତାଳି)
ମୋରେ ଏହି
ଅନୁଗ୍ରହ କର ହେ ରାଧାବର । ଘୋଷା ।
ଅନେକ ଜନ୍ମରୁ ମୁହିଁ ସତ୍ସଙ୍ଗ ତ କରି ନାହିଁ
ବିଷୟା ବିଷକୁ ପିଇଦେଇଛି ହେ ଭାବଗ୍ରାହୀ
କିପରିରେ । ହେବିଟି ଉଦ୍ଧାର ହେ । ୧ ।
ଆନ ଉପାସନା ବାର ଛାଡ଼ି କେବଳ ତୁମ୍ଭର
ଚରଣକଞ୍ଜେ କିଙ୍କରପଣେ ଦିନ ଯାଉ ମୋର
ଏହି ବାଞ୍ଛା । ଏକା ହେଉ ସାର ହେ । ୨ ।
ଏକାନ୍ତରେ ବସି ଭକ୍ତି କରୁଥିବି ବହି ପ୍ରୀତି
ଶୁଦ୍ଧ ଭାବନାରେ ଶାନ୍ତି ହେଉଥିବ ସଦା ମତି
କାମନା ହୃଦରୁ କରି ଦୂର ହେ । ୩ ।
ବ୍ରଜେ ବ୍ରଜେନ୍ଦ୍ରକୁମର ବିନା ଚିତ୍ତେ ସ୍ମରିବାର
ନୋହୁ ଜନ୍ମ ଜନ୍ମାନ୍ତର ଦେବ ମାତ୍ର ଏହି ବର
ମାଗୁଅଛି । ହେବ ଅଙ୍ଗୀକାର ହେ । ୪ ।
ଅନିତ୍ୟ ତ ଏ ଶରୀର ଅଟେ କିପରି ତୁମ୍ଭର
ନାମକୁ ମୁଖେ ଉଚ୍ଚାର କରି ହୋଇଯିବି ପାର
ଗୌରହରି । କହେ ଯୋଡ଼ି କର ହେ । ୫ ।