(ଉପେନ୍ଦ୍ର ଭଞ୍ଜ— ରାଗ ଶଙ୍କରାଭରଣ, ତାଳ ଏକତାଳି)
ଅପୂର୍ବ ଦେଖିଲି ଆଜରେ ସଜନୀ
ତ୍ରଇଲୋକ୍ୟ ଜିଣି ତେରେଛ ଚାହାଣୀ
ତ୍ରିଭଙ୍ଗିମା ଠାଣି ଫୁଟି ଦିଶେ ତେଜ । ଘୋଷା ।
ଅଗସ୍ତିଙ୍କ ତାତ ସଙ୍ଗତରେ ନେଲି
ସାତସୁତା ତଟେ ପ୍ରବେଶ ହୋଇଲି
ଏଗାରରେ ବନ ଆସନ୍ତେ ସଦନ
ପଥରେ ଦେଖିଲି ସେ ରସିକରାଜ । ୧ ।
ଦେଖିଲା ବେଳକୁ ତ୍ରିଭଙ୍ଗୀରେ ଛିଡ଼ା
ଦୁଇସୁତ କଲା ଦ୍ୱିଗୁଣରେ ପୀଡ଼ା
ଚନ୍ଦ୍ରସୁତ ଥିଲା କାହିଁ ହଜିଗଲା
ଲାଜ ପାଇଗଲା ବିରାଟ ତନୁଜ । ୨ ।
ଶୈଳସୁତାପତି ସୁତର ବାହନ
ପୁଚ୍ଛ ମସ୍ତକରେ ଦିଶେ ଶୋଭାବନ
ସତାଇଶପତି ସଙ୍ଗରେ ଥିବାରୁ
ଦୂରୁ ଦେଖି ସଖି ପାଇଲି ମୁଁ ଲାଜ । ୩ ।
ଆଠ ପାଞ୍ଚ ଧରି କହୁଅଛି ତୋତେ
ଚାରିସୁତା ଭ୍ରାତ ଆଣିଦେବୁ ମୋତେ
ଉପଇନ୍ଦ୍ର ଭଣି ରାଧା ବାଣୀ ଶୁଣି
ମନ ସୂତ୍ରେ ଗୁଣି ଦୂତୀ ହେଲେ ସଜ । ୪ ।