(ଉପେନ୍ଦ୍ର ଭଞ୍ଜ— ରାଗ କୃଷ୍ଣକେଦାର, ତାଳ ରୂପକ)
ରଖିଲା ମନ ବିମ୍ବାଧରୀ ଧରିରେ । ଘୋଷା ।
ରମଣୀ ସେ କାହାର । ନୂଆ ହୋଇ ବାହାର ।
ଗତି ମନ୍ଥରେ ନିନ୍ଦା କରି କରୀରେ । ୧ ।
ରସାଣିଲା ହାଟକ । ପରି କାନ୍ତି ଝଟକ ।
ଛବିକି ନିକି ଅପସରୀ ସରିରେ । ୨ ।
ରଦବାସେ ପ୍ରକାଶ । ଝଟକ ମୃଦୁହାସ ।
ପଲକ ତାକୁ ଅନୁସରି ସରିରେ । ୩ ।
ରଙ୍ଗେ ନେତ୍ର କୁଞ୍ଚିତ । ଢାଳୁ କି ଆଣି କୁନ୍ତ ।
ଦେଲା ମରମେ ସୁକୁମାରୀ ମାରିରେ । ୪ ।
ରହନ୍ତି ମୁଁ ସେବାରେ । ଏତେ ଜଣାନ୍ତି ବାରେ ।
ସଙ୍ଗତେ ଥିଲେ ଅନୁଚାରୀ ଚାରିରେ । ୫ ।
ଉପଇନ୍ଦ୍ର କହଇ । ଲଭିବା ଯୋଗ ନାହିଁ ।
ମଲିଟି ହେଲା ହରଅରି ଅରିରେ । ୬ ।