(ଉପେନ୍ଦ୍ର ଭଞ୍ଜ— ରାଗ ଭୈରବୀ, ତାଳ ଏକତାଳି)
ନ କରରେ ରାମା ମାନ । କହୁଛି ବିନୟ ଘେନ ।
କିଣାଜନ ଠାରେ ମାନ କଲେ କି ହେବ ସମାନ । ଘୋଷା ।
ତୁ ମୋ ଗଳା ରତ୍ନମାଳା । ବାଳାରେ ନେତ୍ରପିତ୍ତୁଳା ।
କାମସିନ୍ଧୁରେ ମୋ ଭେଳା ନ ବୁଡ଼ା ନବଛଇଳା । ୧ ।
ଲଗାଇ ପ୍ରୀତି ବଲ୍ଲରୀ । ନ ଛେଦ ଶ୍ରୀହସ୍ତେ ଧରି ।
ବାନ୍ଧବୀ ମୁଁ କିଣା ପରିଜନ ତୋର ବିମ୍ବାଧରୀ । ୨ ।
ମୁଁ ଯେବେ ହୋଇଲି ଦୋଷୀ । ତୁ ପରା କରୁଣାରାଶି ।
ଶରଣ ପଶିଲି ଆସି ରଖ ମୋତେ ମଦାଳସୀ । ୩ ।
କାନ୍ତା କାନ୍ତ ବାଣୀ ଶୁଣି । ହରଷେ ରମଣୀମଣି ।
ଆରମ୍ଭିଲେ ପ୍ରୀତି ପୁଣି ଉପଇନ୍ଦ୍ର ଭଞ୍ଜ ଭଣି । ୪ ।