(ଉପେନ୍ଦ୍ର ଭଞ୍ଜ— ରାଗ ନଟନାରାୟଣ, ତାଳ ଏକତାଳି)
ଶ୍ରୀମତୀ ଶ୍ରୀପତି ବୃନ୍ଦାବନେ କେଳି ରଚିଲେ । ଘୋଷା ।
ବୃନ୍ଦାବନ ଶୋଭାତରୁ ତରୁ ତଳେ କଳ୍ପତରୁ
ତରୁଣୀ ରତନତରୁ ତରଳାକ୍ଷୀ ମାତିଲେ । ୧ ।
ସାରଙ୍ଗରଦ ପଲଙ୍କେ ସାରଙ୍ଗ ପଙ୍କିଳ ପଙ୍କେ
ସାରଙ୍ଗମୁଖୀ ସାରଙ୍ଗ ସାରଙ୍ଗରେ ମାତିଲେ । ୨ ।
କମଳ ଦେଶେ କମଳ କମଳେ କମଳ ମାଳ
କମଳମୁଖୀ କମଳ କମଳରେ ମାତିଲେ । ୩ ।
ହରି ପରେ କରୀ ଘେନି ହରଷେ ମୃଗଲୋଚନୀ
ହରିରିପୁ ରିପୁହର ହର ସେବା ବାଞ୍ଛିଲେ । ୪ ।
ଅଶେଷ ରସରେ ରସି ରସାଇ ରସିକ ରସି
ହରଷରେ ରସି ରସେ ଉପଇନ୍ଦ୍ର ଭାଷିଲେ । ୫ ।