(ଉପେନ୍ଦ୍ର ଭଞ୍ଜ— ରାଗ କାମୋଦୀ, ତାଳ ତ୍ରିପଟା)
ଆସି ଘନ କାଳ ହୋଇଲା ରେ
ଘନକେଶୀ ସଙ୍ଗ ନୋହିଲା ରେ । ଘୋଷା ।
ବରହୀ ଏକାଳେ ବିରହୀ ହୋଇ
ବିଦେଶେ ରହିଲେ ମୋ ପ୍ରାଣସହି
ପର ପରା କରି ତା ମୁଖ ଚାହିଁ
ଭାଙ୍ଗି ବାଣୀ ତନୁ ଦହିଲା ରେ । ୧ ।
ଆସିଲା ବେଳକୁ ରମଣୀମଣି
ଧରି ନ ଛାଡ଼ିଲା ମୋ ବେନି ପାଣି
ଦିନ ସରିବ କି ତା ଗୁଣ ଗୁଣି
ଝୁରି ଝୁରି ନିଶି ପାହିଲା ରେ । ୨ ।
ଚଉଷଠି ବନ୍ଧ ଜାଣେ ରମଣୀ
ଚତୁର୍ମାସ୍ୟା ଦେଖି ସରିଯିବଣି
ଆଳୀ ହୃଦୟରେ ଆଉଜିବଣି
ମାର ଶରେ ତନୁ ଦହିଲା ରେ । ୩ ।
ଦାରୁଣ ପଣେ ଅଇଲି ପାଶୋରି
କାରୁଣ୍ୟ କଲେ କି ପାଇବି ଗୋରୀ
ଭଣେ ଉପଇନ୍ଦ୍ର ଭଞ୍ଜ ବିଚାରି
ବଇରାଗୀ ହେବି ବୋଇଲା ରେ । ୪ ।