(ଗୋପାଳକୃଷ୍ଣ— ରାଗ ଗାନ୍ଧାର, ତାଳ ପହପଟ)
ପାମର ମନ ରାମ ଅନୁଜ ନାମକୁ ରଟୁଥାରେ
ବାମ ନୋହିବ ତାମରସର ବନ୍ଧୁଜ ତୋହଠାରେ । ଘୋଷା ।
କାମମୋହନ ଶ୍ୟାମସୁନ୍ଦର ଦାମ ଉଦର ମନ୍ଦରଧର
ଧାମକୁ ଯାଇ କୁଟୀର ବନାଇ ବସ ହଂସଜା ପନ୍ତାରେ । ୧ ।
ଗ୍ରାମ ଯାବଟ ଶ୍ରୀନନ୍ଦୀଶ୍ୱର ମୁଖରାଇ ବରଷାଣ ନବର
ବୁଲି ଝୁଲି ଧରି ମାଗି ମଧୁକରୀ ଭୁଞ୍ଜ ରାଧେଶ୍ୟାମ ନାଁରେ । ୨ ।
ସମର୍ଥ ଆଉ ପଳାଇଯା ଯା ପରିହରି ସୁତ ବିତ୍ତ ଭାରିଯା
ଉନମତ୍ତ ହୋଇ କରେ ତାଳି ବାଇ କୃଷ୍ଣଗୁଣ ଗୀତ ଗାଆରେ । ୩ ।
ଯାମ ଯାମକେ କର ସ୍ମରଣ ଶ୍ରୀ ଯୁଗଳ ଲୀଳା ରସ କଥନ
ସାଧନେ ସ୍ୱତନ୍ତ୍ର କାମ ବୀଜମନ୍ତ୍ର ଗୋପାଳକୃଷ୍ଣେ ଜପାରେ । ୪ ।