(ଗୋପାଳକୃଷ୍ଣ— ରାଗ ମାଳବଗୌଡ଼ା, ତାଳ ଯତି)
ମନରିଝା ପୀରତି କେ କଲାନି ମନା
ଭିନ୍ନ କଲେ କରଇ ଦଇବ ସିନା । ଘୋଷା ।
ଜାତି ନୀତି ଧନ ମହତ୍ତ୍ୱ ଗୁମାନ
ତେଜିବାକୁ ଅଛି ଯାର ଆଲୋଚନା । ୧ ।
ଚାର କି ଚାକର ଚାହିଁଲେ ତାହାର
କରଇ ଯେ ପ୍ରଭୁ ସମ ସମ୍ଭାବନା । ୨ ।
ଯା ଲାଗି ଯା ପ୍ରାଣ ଯିବ ଏ ପ୍ରମାଣ
ଦେଲେ ଛାଡ଼ିବ କି ତା ତୁଳରେ ସୁନା । ୩ ।
ନୟନ ଅୟନେ ଶୟନେ ସ୍ୱପନେ
ନ ଦିଶଇ ଆନ ତା ମୂରତି ବିନା । ୪ ।
ଯିବା ଯାଏ ଶିର ଯାର ଅଙ୍ଗୀକାର
କଥା ପଦକୁ ଥାଇ କି ତା ଶୋଚନା । ୫ ।
କହଇ ଗୋପାଳକୃଷ୍ଣ ସ୍ନେହଜଳ
-ନିଧି କରିବେ କି ଜନେ ଅକଳନା । ୬ ।