(ଗୋପାଳକୃଷ୍ଣ— ରାଗ ନଟନାରାୟଣ, ତାଳ ଏକତାଳି)
ଜୀବନବନ୍ଧୁ ମାଗୁଣି ମାଗୁଛି ରେ ଏତିକି
ନାହିଁ କରିବୁ ନାହିଁଟି କହିଲା ବିନତିକି । ଘୋଷା ।
ନଚାଇ ଚରମେ ବେଣୀ ବଜାଇ ବଟି କିଙ୍କିଣୀ
ଝୁଲାଇବୁ ବିପରୀତେ ଭୁଲାକିର ମୋତିକି । ୧ ।
ସ୍ତନ ତୁଲେ ତୋରା ହାରା ତାଟଙ୍କ ଝଲକା ଝରା
ଚଳାଇବୁ ଚାହିଁ ମୋତେ ନ ଲିଭାଇ ବତୀକି । ୨ ।
ବିଲୋକିଛି ଦରାଧର ଭିଡ଼ା ମୁଖ ସୁଧାକର
ସ୍ୱେଦ ଜରଜର ଅନମ୍ବର ଦେହ ଦ୍ୟୁତିକି । ୩ ।
ଲତା ମଧ୍ୟରେ ନେଇ ଖଞ୍ଜନ ଡୋଳା ଖେଳାଇ
ଯାହା ବୋଲୁଥିବୁ ଶୁଭୁଥିବଟି ମୋ ଶ୍ରୁତିକି । ୪ ।
ଦୁଃଖରୁ ଉଦ୍ଧରିବାକୁ ଥିଲେ ଗୋପାଳକୃଷ୍ଣକୁ
ଅଙ୍ଗୀକାର କରି ଥରେ ପଠିଆଅ ଦୂତୀକି । ୫ ।