(ଗୋପାଳକୃଷ୍ଣ— ରାଗ ଆଶାବରୀ, ତାଳ ଏକତାଳି)
ବାଜୁଛି ସହି ବାଜାରେ ତୋ ନାଁରେ ବ୍ରଜବଜାରେ । ଘୋଷା ।
ଅଟ୍ଟାଳୀରେ ତୁ ଥିବାର କାନନୁ ସେ ଆସିବାର
ଅନାଅନି ଚମତ୍କାର ଭାବନା ତୋର ତାହାର । ୧ ।
ବ୍ରଜବନ୍ଧୁ ପୀତପଟ ତୋ ନୀଳଶାଢ଼ୀ ପାଲଟ
ହୋଇବାର ବାଟ ଘାଟ ଯାକରେ ହେଲାନି ସ୍ଫୁଟ । ୨ ।
ଯାଇ ଯମୁନା ପାଣିକି ତୁ ନ ବୁଡ଼ାଇ ଘଡ଼ିକି
ନୀପରୁ ଶ୍ୟାମ ଛାଇକି ଅନାଇଁଥିଲୁ ନାହିଁକି । ୩ ।
କହୁଥିଲା ଚନ୍ଦ୍ରାବଳୀ ଶେଯେ ଶିଖଣ୍ଡମଉଳି
ହେଉଥିବାର ବାଉଳି ଜୟ ରାଧେ ରାଧେ ବୋଲି । ୪ ।
ଗୋପାଳକୃଷ୍ଣ କହଇ ଗୋପୀଙ୍କି ସବୁ ଆସଇ
ଆପଣାର ଦୋଷ ନେଇ ପରେ ଦିଅନ୍ତି ଲଗାଇ । ୫ ।