(ଗୋପାଳକୃଷ୍ଣ— ଏକତାଳି)
ବିହି ନାରୀ କରି ମୋତେ କାହିଁ ପାଇଁ ଗଢ଼ିଲା ରେ । ଘୋଷା ।
ବିଧୁ ନିଶି ମଧୁ କାଳ ବହଇ ଦକ୍ଷିଣାନିଳ
ଏକାକିନୀ ନାରୀ ନାଶ ଦଶା ଆସି ପଡ଼ିଲା ରେ । ୧ ।
ଏ ବୟସ ଅକାରଣ ଗଲାରେ ସଜନୀ ଜାଣ
ବନର ମାଳତୀ ପରି ବନେ ଫୁଟି ଝଡ଼ିଲା ରେ । ୨ ।
ନିତି ଦିନ ରାତି ସହି ଭାଳୁ ଗଲା କାଳ ବହି
ମନର କଥା ମନରେ ରହି ଦେହ ସଡ଼ିଲା ରେ । ୩ ।
ମୁଁ ହେଲି ପର ଆୟତ୍ତ ସ୍ୱାଧୀନ ନୋହିଲା ଚିତ୍ତ
ମଦନ ହନ୍ତକ ଖୋଜି ଅନୁବ୍ରତେ ପୀଡ଼ିଲା ରେ । ୪ ।
ଗୋପାଳକୃଷ୍ଣକୁ ବେଳେ ଦେଖିବି ବୋଇଲେ ଡୋଳେ
କୁଳ ଭୟ ଲାଜ କ୍ଷଣେ ଚିତ୍ତରୁ ନ ଛାଡ଼ିଲା ରେ । ୫ ।