(ଗୋପାଳକୃଷ୍ଣ— ରାଗ ବିହାଗଡ଼ା, ତାଳ ଏକତାଳି)
(ମୋତେ) କହରେ ସଙ୍ଗିନୀ କେ ସେ ନୂଆ ଲଳନା
କାନ୍ତି କୁଳ ଦେବତା କି କରି କଳନା । ଘୋଷା ।
ଦଶଦିଶ କାଞ୍ଚନାଭ ଦିଶୁଛି ଏ କି ଦୁର୍ଲ୍ଲଭ
ଦଶାର୍ଦ୍ଧଶର କରିଛି ଏ କି ରଚନା । ୧ ।
ଶୁଣ ନୂପୁର ସୁରତ ମଣିଭୂଷାର ଶିଞ୍ଜିତ
ବ୍ରଜର ଲକ୍ଷ୍ମୀ ପରାଏ ବରବରନା । ୨ ।
ପରଂଧାମର ବିଭୂତି କିବା ମୋ ନେତ୍ରସମ୍ପତ୍ତି
ମୂର୍ତ୍ତିବନ୍ତ ହୋଇ ବିଳସୁଛି କି ଅନା । ୩ ।
ବୃନ୍ଦାରଣ୍ୟ ଜନଙ୍କର କୋଟିଏ କୋଟି ଜନ୍ମର
ଭାଗ୍ୟରାଶି ପରି ହେଉଛି ମୋ ଭାବନା । ୪ ।
ଗୋପାଳକୃଷ୍ଣ ଭାଷଣ ଯେ ନୂତନ ରଣରଣ
ରହି ଅଳପ ଦିନରେ ଚିହ୍ନିବ ସିନା । ୫ ।