(ଗୋପାଳକୃଷ୍ଣ— ରାଗ ମୋହନା, ତାଳ ରୂପକ)
ଯିବା ପରା ପରାଣ ସଙ୍ଗିନୀ ଉଠିଆରେ
ଦିଶୁଥିବ ଶ୍ୟାମ ବାମ ପାଶ ପଡ଼ିଆରେ । ଘୋଷା ।
ବ୍ରଜ ହାଟ ବାଟ ହେଲାଣି ନିଛାଟ
ଜଗିଥିବେ ବ୍ରଜବିଧୁ ନିକୁଞ୍ଜ ଦୁଆରେ । ୧ ।
ପବନେ ପଲ୍ଲବ ଚଳିଲେ ମାଧବ
ପଥ ଚାହୁଁଛନ୍ତି ଧରି କେଶର ପୁଆରେ । ୨ ।
ଆଜ ହେବା ସଜ ପରାର୍ଦ୍ଧ ଚିତ୍ତଜ
ନିଉଁଛାଇ ହେବେ ହୋଇ ପଦତଳିଆରେ । ୩ ।
ଅନା ଓଷଧୀଶ ହେଲାନି ପ୍ରକାଶ
ଶୁଣୁ ନାହୁଁ ଅଛନ୍ତି କୁଞ୍ଜେ ଏକୁଟିଆରେ । ୪ ।
ଯାମ ହେଲା ଆସି ଉଠାଉଛି ବସି
ଭାଳୁ ଭାଳୁ ଡାକିବ ତ କୁକ୍କୁଟ କୁଆରେ । ୫ ।
ଆଳୀ କର ଧରି ଚାହୁଁ ଶ୍ରୀ କିଶୋରୀ
ଗୋପାଳକୃଷ୍ଣ ଭାଷେ ହେଟି ସେ ବଳିୟାରେ । ୬ ।