(ଗୋପାଳକୃଷ୍ଣ— ରାଗ ଶଙ୍କରାଭରଣ, ତାଳ ରୂପକ)
(Alternate version— Raga Bhairabi, Rupaka)
(ଅନ୍ୟ ପାରମ୍ପରିକ ସ୍ୱର— ରାଗ ଭୈରବୀ, ରୂପକ)
କି ନାଦରେ ପ୍ରାଣ ସଙ୍ଗିନୀ ଶୁଭୁଛି କଦମ୍ବ ବନେ
ଶ୍ରୁତିରେ ସୁଧା ବରଷି ଧୃତି ନାଶେ ମଜ୍ଜି ମନେ । ଘୋଷା ।
ଦିଗ ବିଦିଗେ ପ୍ରସରି ଖଗ ମୃଗ ଜଡ଼ କରି
କୁଳବତୀ ନୀବି ଗ୍ରନ୍ଥୀ ଫିଟାଉଛି ଅଯତନେ । ୧ ।
ଜଳ ସ୍ତମ୍ଭ ଗ୍ରାବ ଦ୍ରବ ହୋଇଲା କି ଅସମ୍ଭବ
ଆଜନମୁଁ ଆଜକୁ ମୁଁ ଶୁଣି ତ ନଥିଲି ଦିନେ । ୨ ।
ଆସୁ କିନା ମୋ ପାଶକୁ ଲଭିଲିଟି କି ଦଶାକୁ
ନୀପ ଫୁଲ ପରି ଲୋମ ପୂରିଲା ମୋ ଅପଘନେ । ୩ ।
ତୋଳିଲା କୁସୁମ କରୁ ଗଳିପଡ଼ିଲା ରମ୍ଭୋରୁ
ରହି ପାରିବି ନାହିଁ ମୁଁ ଛାଡ଼ି ଦେ ନେଇ ସଦନେ । ୪ ।
ବଜାଉଛି ରସାଳସୀ ନିକୁଞ୍ଜ ଦେବତା ବଂଶୀ
ଗୋପାଳକୃଷ୍ଣ ଭାଷଇ ପ୍ରକଟିଲା ତ୍ରିଭୁବନେ । ୫ ।