(ଗୋପାଳକୃଷ୍ଣ— ରାଗ ଧନାଶ୍ରୀ, ତାଳ ଏକତାଳି)
କେବେ ନ ଥିବା ରୁଷା ଆଜ କାହିଁକି
ମୋହନ ଠାରୁ ମନ ଭାଜିଗଲା କି । ଘୋଷା ।
ବରଜିବୁ ତୁ ସିନା କିପରି ସେ ତୋ ବିନା
ବଞ୍ଚିବେ ମାନସରେ ପାଞ୍ଚିଲୁନି କି । ୧ ।
ଶ୍ରୀ ବ୍ରଜେନ୍ଦ୍ର ନନ୍ଦନ ମୋ ଜୀବର ଜୀବନ
କେତେ ଥର ବୋଲିଛୁ ପାଶୋରିଲୁ କି । ୨ ।
ମହାଭାବ ରୂପିଣୀ ପ୍ରେମ ଧନରେ ଜିଣି
ଅଧରୁ ସୁଧା ଯାକୁ ଦେଉଥିଲୁ କି । ୩ ।
ଆରେ ପ୍ରାଣମିତଣୀ କେ କି କହିଲେ ଶୁଣି
ଏପରି ହୁଅନା ରେ ଆଉ ଏଣିକି । ୪ ।
ଗୋପାଳକୃଷ୍ଣ ବୋଲେ ହାତ ଧରି ପହିଲେ
ଆନ ପକାଇ କୁହାଯାଇ ନାହିଁକି । ୫ ।