(ବନମାଳୀ— ରାଗ ମୋହନ କେଦାର, ତାଳ ରୂପକ)
ତୋ ଲାଗି ଗୋପଦାଣ୍ଡ ମନା ରେ କାଳିଆ ସୁନା
ତୋ ଲାଗି ନ ଯିବି ଯମୁନା । ଘୋଷା ।
ନିତି ଏହି ବାଟେ ଯାଉ ରେ କାଳିଆ
ନିତି ଏହି ବାଟେ ଯାଉ
ଘାଟର କଉଡ଼ି ମାଗିଲେ କାଳିଆ
ମୁରଲୀ ବଜାଉ ଥାଉ ରେ । ୧ ।
ତୁହି ଗୋପପୁରେ ରଜା ରେ କାଳିଆ
ତୁହି ଗୋପପୁରେ ରଜା
କେମନ୍ତ ସଜରେ ମୁରଲୀ ବଜାଉ
ଆଉରି ଟିକିଏ ବଜା ରେ । ୨ ।
ତୁହି ବଡ଼ଘର ପୁଅରେ କାଳିଆ
ମୁହିଁ ବଡ଼ଘର ବୋହୂ
ଶରମ ତୋ ମୁଖେ ନାହିଁ ରେ କାଳିଆ
ମରମ କଥା ତୁ କହୁ ରେ । ୩ ।
ତୁହି ଅଟୁ ନନ୍ଦଚାଟ ରେ କାଳିଆ
ତୁହି ଅଟୁ ନନ୍ଦଚାଟ
ମଥୁରା ହାଟକୁ ଦଧି ବିକି ଗଲେ
ନିତି ମାଗୁଥାଉ ଘାଟ ରେ । ୪ ।
କହଇ ବଲ୍ଲଭାନନ୍ଦ ଏ ରସରେ
ଶୁଣ ଆଗୋ ସଖୀବୃନ୍ଦ
ଯମୁନା କୂଳରେ ମୁରଲୀ ବଜାଏ
ତୁମ୍ଭ ଘେନି କୃଷ୍ଣଚନ୍ଦ୍ର ରେ । ୫ ।