(ବନମାଳୀ— ରାଗ କଲ୍ୟାଣ, ତାଳ ଏକତାଳି)
ଦାରୁଣ ନେତ୍ରାନ୍ତକୁ ମୁଁ ଏଣୁ ଡରୁଥାଇ । ଘୋଷା ।
ଯହିଁକି କରଇ ମନା । ତହିଁକି କରି କାମନା ।
ଅଗମ୍ୟ ପଥକୁ ଗମୁଥାଇ । ୧ ।
ଦେବତା ଦୁର୍ଲ୍ଲଭ ଚିଜେ । ଏ ପାପମନ ନ ବୁଝେ ।
ଆଶା କରି ଲୋଭେ ମରୁଥାଇ । ୨ ।
ପଡ଼ିଲେ ବୁଡ଼ି ରହଇ । ଲୋଡ଼ିଲେ ମିଳଇ ନାହିଁ ।
କାନ ସେହୁ ରସେ ରସିଥାଇ । ୩ ।
ମୃଗମଦ ନୀଳୋତ୍ପଳ । ତା ଶ୍ରୀଅଙ୍ଗ ପରିମଳ ।
ନାସା ମୋର ଆଶା କରୁଥାଇ । ୪ ।
ତାର ଚର୍ବିତ ତାମ୍ବୂଳ । ଅଧ ଅଧରୁ କେବଳ ।
ଚାଖିବାକୁ ଜିହ୍ୱା ଝୁରୁଥାଇ । ୫ ।
ବନମାଳୀ ବୋଲେ ମନ । ହେବାରୁ ତାର ଅଧୀନ ।
ଜୀଇବା ଭରସା ଦିଶୁ ନାହିଁ । ୬ ।