(ବନମାଳୀ— ରାଗ ଗୌଡ଼ା, ତାଳ ତ୍ରିପଟା)
ଏହି କଥାରେ ମୋ ମନ ମହାବାହୁ
ନିତି ଦେଖୁଥିବି ନୀଳାଦ୍ରି ମଣ୍ଡପେ
କଞ୍ଜସୁନ୍ଦର ବଦନ ହେ । ଘୋଷା ।
ଅଞ୍ଜଳିରେ ଜଳ ପିଇ ପିନ୍ଧୁଥିବି
ବକଳ କରି ବସନ
ଶଚୀପତି ପଦ ତୁଚ୍ଛ ମଣୁଥିବି
ଥିଲେ ତୁମ୍ଭ ସନ୍ନିଧାନ । ୧ ।
ଲୋଭୀ ହୋଇଥିବି ଅର୍ଦ୍ଧଚନ୍ଦ୍ର ମୁଖ
ଚନ୍ଦନଲାଗି ବେଳକୁ
ଧୀରେ ଚାହୁଁଥିବି ବିପୁଳ ଭୁଜକୁ
ସୁଭଦ୍ରା କାମପାଳଙ୍କୁ । ୨ ।
ଅବକାଶମାନଙ୍କରେ ମୋ ଲାଳସ
ହୋଇଥିବ ଅହର୍ନିଶ
ତେତେବେଳେ ଡୋଳେ ହେଳେ ନ ଦେଖିବି
ବ୍ରହ୍ମା ରୁଦ୍ର ଦିନଈଶ । ୩ ।
ତିନି ବଦନଚନ୍ଦ୍ରକୁ ଚାହିଁ ମୁହିଁ
ତାପତ୍ରୟକୁ ନାଶିବି
ବୋଲେ ବନମାଳୀ ଜନ୍ତୁପତି ଭୟ
ଲୋକକୁ ଚାହିଁ ହସିବି । ୪ ।