(ରାମାନୁଜ ସିଂହ— ରାଗ ଆଶାବରୀ, ତାଳ ଏକତାଳି)
ସେ ଶ୍ୟାମ ନାଗରବର ପ୍ରୀତିରେ ମୁଁ ଗଲି ସଢ଼ି
ଜାଣି ନଥିଲି ସଜନୀ ହେବି ବୋଲି ଏତେ ସରି । ଘୋଷା ।
ଶ୍ୟାମ ପ୍ରୀତି ବଡ଼ ମନ୍ଦ ନିତି ପ୍ରତିଦ୍ୱନ୍ଦ କଲି
ନନ୍ଦସୁତ ଛନ୍ଦରେ ମୁଁ ପଡ଼ିଗଲି ସହଚରୀ । ୧ ।
ଅଶନ ବସନେ ମନ ପ୍ରସନ୍ନ ନୁହେଁ ମୋହରି
ଝରୁଥାଇ ନିରନ୍ତର ନୟନ ଯୁଗଳୁଁ ବାରି । ୨ ।
ଘରଦ୍ୱାର ବନ ବ୍ୟାଧବେଶେ ଦିଶେ ଶମ୍ବରାରି
ଖଣ୍ଡ ଖଣ୍ଡ କରେ କାଣ୍ଡ ପିଣ୍ଡକୁ ମୋ ସହଚରୀ । ୩ ।
ଦିନୁ ଦିନ ହେଲି କ୍ଷୀଣ କି କଲି ମୁଁ ନ ବିଚାରି
ବୋଲେ ରାମାନୁଜ ସିଂହ ପ୍ରୀତିକି ଦୂରୁ ଜୁହାରି । ୪ ।