(ଦ୍ୱିଜ ପୀତାମ୍ବର— ରାଗ କେଦାର, ତାଳ ତ୍ରିପଟା)
କହରେ ସଜନୀ ଆଜ ଏ ରଜନୀ
ମୋ ପ୍ରାଣନାୟକ ଆସିବେ କି । ଘୋଷା ।
କେଳିଗୃହେ ମିଳି କରିବେ କି କେଳି
ରସାଇ ମୋ ମନ ରସିବେ କି । ୧ ।
ନାୟକରତନ ଦେଇ ଚୁମ୍ବଦାନ
ସୁରତେ ମୋ ମନ ତୋଷିବେ କି । ୨ ।
ସେ ନନ୍ଦନନ୍ଦନ ଶ୍ରୀ ମଧୁସୂଦନ
ଆସି ମୋ ପଲ୍ୟଙ୍କେ ବସିବେ କି । ୩ ।
ଖଣ୍ଡିବେ ଅଦେହ ଦଣ୍ଡକୁ ମୋହର
ବିନୟରେ ଚାଟୁ ଭାଷିବେ କି । ୪ ।
ଦେଇ ଚିବୁକରେ କର ମୋ ଚିକୁରେ
ଶ୍ୟାମଳୀ କୁସୁମ ଖୋଷିବେ କି । ୫ ।
ଘୋଟିଛି ମଦନ ଅନ୍ଧାର ସଦନ
ମୋହନଚନ୍ଦ୍ର ପ୍ରକାଶିବେ କି । ୬ ।
ବୋଲେ ପୀତାମ୍ବର ରତି ହୃଦ ଚୋର
ଅଇରି ତାପ ତା ନାଶିବେ କି । ୭ ।