(ରାମଚନ୍ଦ୍ର ଦେବ— ରାଗ ପଞ୍ଚମ ବରାଡ଼ି, ତାଳ ଯତି)
ପ୍ରାଣସଙ୍ଗିନୀ ରେ ହେଲା ବଡ଼ ପରମାଦ
ଶୁଭେ କି ରଞ୍ଜନ ଧଇର୍ଯ୍ୟ କମ୍ପନ
ମୋହନ ମୁରଲୀ ନାଦ । ଘୋଷା ।
ଡାକେ ସରସରେ ନ ରଖେ ବାସରେ
ନିରତେ ଲାଗି ବିବାଦ
ଶୁଣିବା ମାତ୍ରକେ ଅନ୍ୟ ତା ବ୍ୟତ୍ରକେ
ମନରେ ହୁଏ ବିଷାଦ । ୧ ।
ଥିଲେ ଗୁରୁଜନ ହେଲେ ତ ରଞ୍ଜନ
ଝିଙ୍କିନିଏ କରି ପାଦ
ହୋଇଣ ପ୍ରବଳ କରାଏ କେବଳ
ମଦନ ମଦ ଉନ୍ମାଦ । ୨ ।
କି ମଧୁର ଧ୍ୱନି ଲାଗଇ ମୋ ଧୁନି
ବାସରୁ ବଳି ସୁଆଦ
ମରାଇ ରତିରେ ପତିବରତୀରେ
ନିତି କରେ ପରିବାଦ । ୩ ।
ରାମଚନ୍ଦ୍ର ଦେଉ ବୋଲେ କହେ ଆଉ
ଚିନ୍ତି ସେ ଗୁଣାନୁବାଦ
ବୋଲଇ କିଶୋରୀ ତିଳେ କି ପାସୋରି
ଲୋଡ଼େ କାହା ଆହାଲାଦ । ୪ ।