(ହରି— ରାଗ ଚଳଘଣ୍ଟ କେଦାର, ତାଳ ଯତି)
ଯାହା ଇଚ୍ଛା ତାହା ହେଉ ରେ ସଙ୍ଗାତ
ଜଳିଗଲା ବନ ବଳିଗଲା ମନ
ଲେଉଟି ଆସେ କି ଆଉ ରେ । ଘୋଷା ।
ଲସିଲେ ଲସୁ ମୋ ଗୁରୁତ୍ତ୍ୱ ବସିଲେ
ବସୁ ହଟହଟା ହାଟ
ହସିଲେ ହସନ୍ତୁ ଅସହଣୀମାନେ
ନ ତେଜିବି ନନ୍ଦଚାଟ । ୧ ।
ଶିରୀଷ ଗିରୀଶ ଶୀରୀଷରେ ଦେଇ
ତୁଳସୀ ଚମ୍ପକରାଶି
ନାଗରବର ଅମୂଲ୍ୟ ହେମ ପ୍ରେମ
ମିଳିଛି ସେ ଫଳେ ଆସି । ୨ ।
ତିଆଗ ମୁଁ ଆଗ କରି ଲାଜ ବ୍ୟାଜ
ଘର ଦରବ ସ୍ନେହକୁ
ଶ୍ୟାମ ତାମରସ ପାଦରେ ସାଦରେ
ବିକିଅଛି ଏ ଦେହକୁ । ୩ ।
ପୀତବାସ ବାସ କଲେଣି ଈକ୍ଷଣେ
କ୍ଷଣେହେଁ ନୋହି ଅନ୍ତର
ସ୍ମରଣ ଅନ୍ତରଗତେ ସେ ମନ୍ତର
-ବତ ସତ ନିରନ୍ତର । ୪ ।
ଧରାଧର ପ୍ରୀତି ବରଧନ ବରଧନେ
ଏ କାରଣେ ଗତି
ଭାଷେ ହରି ରାସେଶ୍ୱରୀ ରାଧା ସହୀ
ଆଗେ ଏ ଭାଷା ଭାଷନ୍ତି । ୫ ।