(ଦ୍ୱିଜ ନାରାୟଣ— ରାଗ କଲ୍ୟାଣ ଆହାରୀ, ତାଳ ଏକତାଳି)
ପାଶୋରିବି ନ ପାରିବି ସେ ପ୍ରାଣେଶ୍ୱରୀକି* । ଘୋଷା ।
ଫୁଲ ଅମ୍ବୁଜ ନୟନୀ ଅଶେଷ ସୁଖ ଦାୟିନୀ
ସା ରି ଗା ମା ପ ଦାୟିନୀ ନବୀନ କିଶୋରୀକି । ୧ ।
କନକ କେତକୀ ଦଳ ଦଳା ଗୋଳା ହରିତାଳ
ତପତ ହେମୁ ଜମ୍ଭାଳ ଗୋରଚନା ଗୋରୀକି । ୨ ।
ଅସର ଦୁଃଖକୁ ସେବି ଏବେ ମୁଁ ବିଦେଶୀ ହେବି
ମାର ମୁଖେ ସିନା ଦେବି ପଲ୍ଲବ ଅଧରୀକି । ୩ ।
ନାରାୟଣ ଧରାଦେବ ବୋଲେ ସେ ଏମନ୍ତ ହେବ
ମୋ ବନ୍ଧୁ ଜୀବନେ ଥିବ ମୋ ଆସିବା ସରିକି । ୪ ।
ପାଠାନ୍ତର : ପରା ପରାଣ ଈଶ୍ୱରୀକି