(ଦ୍ୱିଜ ଲୋକନାଥ— ରାଗ ପରଜ, ତାଳ ଏକତାଳି)
ଆଉ କି ଉପାୟ କରି ମୋହନକୁ ପାଇବି
ଶ୍ୟାମବନ୍ଧୁ ବିନେ ମୁହିଁ କାଳକୂଟ ଖାଇବି ଗୋ । ଘୋଷା ।
କାହାକୁ କରିବି ସାହା କେ ଦେବ ମୋ ପ୍ରାଣନାହା
ଖଣ୍ଡିବ ମୋ ଦୁଃଖ ଆହା କାହା ଆଗେ କହିବି । ୧ ।
କରି ତା ଶ୍ରୀଅଙ୍ଗ ସେବା ବଞ୍ଚିବି ରଜନୀ ଦିବା
ଲାଜ ଭୟ ଛାଡ଼ି ଏବେ କାହା ନାମ ଗାଇବି । ୨ ।
କଲି ତାହା ଠାରେ ଆଶା ଭୋଗ କଲି ଏତେ ଦଶା
କେବଳ ମୋ ଲୋକହସା ସହି କେତେ ରହିବି । ୩ ।
କହେ ଦ୍ୱିଜ ଲୋକନାଥ ଆୟତ୍ତ ନୋହିଲା ଚିତ୍ତ
ସତ୍ୟ କହୁଅଛି ମିତ ନିଶ୍ଚେ ପ୍ରାଣ ହାରିବି । ୪ ।