(ସୋମନାଥ ସିଂହ— ରାଗ ଭାଟିଆରୀ, ତାଳ ଏକତାଳି)
ନାହା ରହିଲେ କାହା ସଦନେ ଗୋ
ମୋର ଯାହା ହେଉଛି ଦେହ ମଦନେ ଗୋ
କା ଆଗେ କହିବଇଁ ସାହା ତ କେହି ନାହିଁ
ଆହା ବୋଲନ୍ତି ଚନ୍ଦ୍ରବଦନେ ଗୋ । ୧ ।
ଆସିବେ ବୋଲି ନନ୍ଦକୁମର ଗୋ
ବେଗେ ମଣ୍ଡନ କଲି କେଳିମନ୍ଦିର ଗୋ
ନାନା କୁସୁମେ ଆଳୀ କରେ ଗୁନ୍ଥାଇ ମାଳି
ଗୋଳି ରଖିଲି ଚୂଆ ଚନ୍ଦନ ଗୋ । ୨ ।
ବାସକସଜ୍ଜା କେଳି ସଦନେ ଗୋ
ସହି ନିଶି ବଞ୍ଚିଲି ଘୋର କଦନେ ଗୋ
ରମଣୀ ଶିରୋମଣି କେଉଁ ମାନସ କିଣି
ନେଲା କଟି କିଙ୍କିଣୀ ବାଦନେ ଗୋ । ୩ ।
ସୋମନାଥ ବୀରବର ବଦତି ଗୋ
କୁଶଳେ ଅନୁଗୁଳ ଭୂପତି ଗୋ
ବୋଲନ୍ତି ରାଜସୁତା ହୋଇଣ ଉତ୍କଣ୍ଠିତା
ମତେ ନିବେଶି କେଳିସଦନ ଗୋ । ୪ ।