(ମୋହନ ଗୋସେଇଁ)
ଛନ୍ଦା ଚରଣ ମୋତେ ତାରିବ କି
କନ୍ଦାଇ କନ୍ଦାଇ ମାରିବ କି
ଫନ୍ଦା କଲି ବୋଲି ପଦାରବିନ୍ଦକୁ
ଧନ୍ଦାରେ ପକାଇ ସାରିବ କି । ଘୋଷା ।
ବନ୍ଧା ଦେଇଛି ଏ ଜୀବନକୁ
ବୃନ୍ଦାବନ ମଦନମୋହନଙ୍କୁ
ନିନ୍ଦା ତେଜି ପ୍ରେମ ମନ୍ଦାକିନୀ ଧାରା
ନୟନୁ ଝରି ତନୁ ଘାରିବ କି । ୧ ।
କନ୍ଦାଇଲ ମୋହ ମାୟା ପାଶେ
ନନ୍ଦାତ୍ମଜ ପ୍ରଭୁ ନିଜ ଦାସେ
ବନ୍ଦାଇବା ଲାଗି ବନ୍ଦାଣ ତଣ୍ଡୁଳ
(ଦାସୀ) ଥାଳି ଧରି ରହି ପାରିବ କି । ୨ ।
ମନ୍ଦାର ଅଧରା ବ୍ରଜବାଳୀ
ପିନ୍ଧାବାସ ଚୋରା ବନମାଳୀ
ଚନ୍ଦ୍ରାବଳୀ ନାଥ ବୋଲି ଗରବରେ
ରାଧା ଦାସୀକି ନ ଠାରିବ କି । ୩ ।
ଅନ୍ଦାଜେ ନ ଜାଣେ ଅନ୍ଧ ମୁହିଁ
ଛନ୍ଦା ଚରଣ ପାଇବି କାହିଁ
ବୃନ୍ଦାବନେଶ୍ୱରୀ ସେବକୀ ମୋହନା
ଯମୁନାରେ ଜୀବ ହାରିବ କି । ୪ ।