(କବିଚନ୍ଦ୍ର କାଳୀଚରଣ— ରାଗ ଚନ୍ଦ୍ରକାନ୍ତ, ତାଳ ଏକତାଳି)
ଫେରି ଫେରି ଅନା ଅନା ଏଣୀନୟନା
ଝୁରି ଝୁରି ତୋ ବିନାରେ ସରେ ମୋହନା । ଘୋଷା ।
ଏକେ ତ ସେ କଳା ଡୋଳା
କାଳିଆ କଜ୍ଜ୍ୱଳ ବୋଳା
ବିରହେ କି ରହେ ସହୀ କାଳିଆସୁନା ।
(ପଡ଼ି)
କୁଞ୍ଜବନେ ଯେବେ ମଧୁମଳୟ ଭରେ
ସଞ୍ଜ ହେରି ତାର ନୀର ନିରତେ ଝରେ
ମାନ ମନୁ ବାରିଦେ ରେ ସୁବଦନା । ୧ ।
କାମ କମାଣ ତୋ ଭୂରୁ
ଶ୍ୟାମ ତ ଜୁହାରେ ଦୂରୁ
ଚଳାଇ ମରମ ତାର ନ କର ଚୂନା ।
(ପଡ଼ି)
ଆନ ମାନ ମୋର ଆନ ମନେ ନ ଧର
ନ ଧର ଅଧରୁ ତୁ ବରଷ ମଧୁ ଧାର
ଭାଷ ଭାଷ ରସଭାଷ ବୀଣାଜିଣା । ୨ ।
କର କଙ୍କଣ ମଣି
କାଚକଣି ତୁ ମଣି
ଦୂରେ ବରଜି ଗୋରୀ ଝୁରି ସରନା ।
(ପଡ଼ି)
ଆରେ ଗଜଗତି ମନମୋହନା ଗତି
କବିଶଶୀ ବଦତି ହସିବେଟି ଅରାତି
ଆସେ ନିଶି ସରି ଆଉ ତୁ ରୁଷନା । ୩ ।