(କବିଚନ୍ଦ୍ର କାଳୀଚରଣ— ରାଗ ବାଗେଶ୍ରୀ, ତାଳ ଏକତାଳି)
ନାହିଁ ନାହିଁ ମୁଁ ଯା କହିଲି
ମାନ ମାରି ଆନ ମାନ ଦେଲି । ଘୋଷା ।
ମାଧବୀ ଚାନ୍ଦିନୀ ରାତି । ମାଧବ ଥିଲେ ମୋ ସାଥୀ ।
ପଥରେ ବନ୍ଧାଇ ଛତି ଗୁମାନେ ଯା ନ ଚାହିଁଲି । ୧ ।
କର ଧରି କେତେ ମୋର । ରଚିଲେ ଗୋ ଚାଟୁ ଗିର ।
ପର ପରା କରି ତାର ପରାଭବ ମୁଁ ସହିଲି । ୨ ।
ଦୂରେ ଯା ବସିଲି ଘୁଞ୍ଚି । ଗରବ ରଖିଲି ସଞ୍ଚି ।
ଧାର ଆଖି ନୀର ସିଞ୍ଚି ଜୀବେ ଯା ବଞ୍ଚି ରହିଲି । ୩ ।
କବିଚନ୍ଦ୍ର କହେ ଧୀରା । ଆପେ ତୁ ନ ଦେଲୁ ଧରା ।
ଏ ନୁହେଁ ସୁଆଗ ଧରା ହୁଡ଼ିଲୁ ପୀରତି ଚାଲି । ୪ ।