(କବିସୂର୍ଯ୍ୟ— ଏକତାଳି)
(Suchitra Prabandha)
(ସୁଚିତ୍ର ପ୍ରବନ୍ଧ)
ଆରେ ରାବଣ
ବାରେ ଶୁଣ ମୋ ଗିର
ଆଜ୍ଞା ଦେଲେ ରଘୁବୀର ଛେଦିବି ତୋ ଦଶ ଶିର । ଘୋଷା ।
ସେ ପ୍ରଭୁ ପରମେଶ୍ୱର କୋଟି ବ୍ରହ୍ମାଣ୍ଡ ଈଶ୍ୱର
ସୂର୍ଯ୍ୟବଂଶେ ଅବତାର ଶ୍ୟାମସୁନ୍ଦର
ଶ୍ରୀ ରାମ ନାମ ତାଙ୍କର ସର୍ବ ଗୁଣେ ଶୋଭାକର
ଦୁଷ୍ଟଙ୍କ ଦର୍ପ ବିନାଶି ଊଶ୍ୱାସିବେ ମହୀ ଭାର । ୧ ।
ପିତା ସତ୍ୟ ପ୍ରତିପାଳି ବନେ ହେଲେ ତପଚାରୀ
ଘେନି ଜନକ ଦୁଲ୍ଲାଳୀ ଭାଇ ସଙ୍ଗର
ଏବେ ତୁ ତାହାଙ୍କ ନାରୀ ଆଣିଅଛୁ ଚୋରି କରି
ବିଜେ କଲେ ଚାପଧାରୀ ଘେନିଣ ସୈନ୍ୟ ସଙ୍ଗର । ୨ ।
ଏବେ ବୁଦ୍ଧି ଥିଲେ ଜାଣି ଦେଇ ଶ୍ରୀ ରାମ ଘରଣୀ
ଶରଣ ପଶି ତୁ ପୁଣି ହୁଅ ଚାକର
କବିସୂର୍ଯ୍ୟ ଗୀତେ ଭଣି ନୋହିଲେ କୋଦଣ୍ଡପାଣି
ସବଂଶ ତୋହର ହାଣି ପଠାଇବେ ଯମପୁର । ୩ ।