(ବନମାଳୀ— ରାଗ ମାଳବଗୌଡ଼ା, ତାଳ ଏକତାଳି)
ଉଠ ନିଶି ପାହିଲା ଏଥର ହେ ବଂଶୀଧର । ଘୋଷା ।
ମନ୍ଦିରେ ଡାକିଲେ ଶୁକ ବୃକ୍ଷରେ ରାବିଲେ କାକ
କୁହୁ କୁହୁ ରଟେ ପିକ କୁକ୍କୁଟ ଡାକିଲେ ପରଖର ହେ । ୧ ।
ଡାକେ ଯଶୋବନ୍ତୀ ଭାଳି ଉଠ ମୋର ବନମାଳୀ
ଶ୍ରୀମୁଖ ଦେବି ପଖାଳି ଝରୀରେ ରଖିଛି ବାସ ନୀର ହେ । ୨ ।
ଅମୃତପାଣି କଦଳୀ ଲବଣୀ ସଙ୍ଗତେ ଗୋଳି
ଅଧାମ ଗୋଟିକା ପୁଳି ଖଣ୍ଡ ସଙ୍ଗେ ଭୁଞ୍ଜାଇବି ସର ହେ । ୩ ।
ଉଠ ରାମ ବାସୁଦେବ ଗୋଗୋଷ୍ଠେ ଉଛୁର ହେବ
ଦଧି ଅନ୍ନ ସାଥେ ନେବ ନଦୀ କୂଳେ କରିବ ଆହାର ହେ । ୪ ।
ବାଛୁରୀ ଚରାଇ ଯାଇ କାଲି ପଥ ଶ୍ରମ ପାଇ
ଅଳସଇ ଅଛୁ ଶୋଇ ଅଶକତ ହୁଏ କି ଶରୀର ହେ । ୫ ।
ସିଂହ ଦ୍ୱାରେ ଗୋପ ସୁତ ଡାକନ୍ତି ଉଠ ଅଚ୍ୟୁତ
କେତେ ନିଦ୍ରା ଯାଉ ତୁ ତ ଆକାଶେ ଉଦୟ ଦିନକର ହେ । ୬ ।
ଉଠ ପ୍ରଭୁ ଚକ୍ରଧର ଯିବାକୁ ହେବ ଉଛୁର
ବନକୁ ଗମନ କର ବନମାଳୀ ଚରଣେ କିଙ୍କର ହେ । ୭ ।