(ରାମଚନ୍ଦ୍ର ଦେବ— ଝୁଲା)
ଆସୁଛନ୍ତି ବ୍ରଜବାସୀ
ଧୀରେ ଧୀରେ ଚାଲି ଚାଲି ଗୋ । ଘୋଷା ।
ଦିନ ଶେଷ ସମୟରେ
ରହି ସୁରଭୀ ପଛରେ
ବଜାଉଛନ୍ତି ମୁରଲୀ
ଧୀରେ ଧୀରେ ଚାଲି ଚାଲି ଗୋ । ୧ ।
ଇନ୍ଦ୍ରନୀଳମଣି ତନୁ
ପରିହାସ ଜାତ ମନୁ
ଝୁଲନ୍ତି ବରହୀ ଚାଲି
ଧୀରେ ଧୀରେ ଚାଲି ଚାଲି ଗୋ । ୨ ।
ଦେଖିବା ସଜନୀ ଚାଲ
ନୋହିବାଟି କଲବଲ
ଫିଙ୍ଗିବେ ସେ ନେତ୍ର ଭାଲି
ଧୀରେ ଧୀରେ ଚାଲି ଚାଲି ଗୋ । ୩ ।
ନାଗେଶ୍ୱର ନାଦ ପରି
କଟୀ କିଙ୍କିଣୀକି କରି
ଖେଳାନ୍ତି ଅହି ଭ୍ରୂବଲ୍ଲୀ
ଧୀରେ ଧୀରେ ଚାଲି ଚାଲି ଗୋ । ୪ ।
ରାମଚନ୍ଦ୍ର ଦେବ ଭଣି
ଭାଷଇ କେଉଁ ରମଣୀ
କଲେ କେତେ ଭଙ୍ଗୀ କାଲି
ଧୀରେ ଧୀରେ ଚାଲି ଚାଲି ଗୋ । ୫ ।