(ଗୋପାଳକୃଷ୍ଣ— ଖେମଟା)
ମୋହନ ମାଧୁରୀ ଦେଖିଥିଲା ନାରୀ
ନିଦ ଯିବକି ଆହୁରି ରେ । ଘୋଷା ।
ଦୃଷ୍ଟିପାତ ଠାରେ ଅନୁବରତରେ
ଛବି ଦିଶିବ ତାହାରି ରେ
ପାଶକୁ ଆସିଲା ପରି ଲାଗୁଥିବ
ହସି ହସି ବଂଶୀଧାରୀ ରେ । ୧ ।
କି ସହିବ ନାହିଁ କେଉଁ ଦେବତାଙ୍କୁ
ତା ପ୍ରୀତି ପାଇଁ ଜୁହାରି ରେ
ସବୁ ବରତ କରିବି ବୋଲୁଥିବ
ପାଇଲେ କୁଞ୍ଜବିହାରୀ ରେ । ୧ ।
କୃଷ୍ଣ ବୋଲି କେଣେ କାହିଁକି କେ ତେଣେ
ଡାକିଲେ ପୂରୁଁ ବାହାରି ରେ
ଚଉଦିଗକୁ ଚାହିଁ ମାର ମୋଦରେ
ହୋଇ ନ ଯିବକି ଘାରି ରେ । ୩ ।
କଳିନ୍ଦଜା ତୀରେ ନିକୁଞ୍ଜ କୁଟୀରେ
ନିଛାଟ କାଳ ବିଚାରିରେ
ମିଳିବା ପାଇଁକି କେତେ ଥର ହେଲେ
ଆଣି ନ ଯିବ କି ବାରି ରେ । ୪ ।
ସୁଗୁଣ ସୁନ୍ଦରପଣ ଯାକ ଗୁଣି
ଏକାଇ ତାକୁ ହିଆରି ରେ
ବୋଲେ ଗୋପାଳକୃଷ୍ଣ ଜୀବ ଥିଲେକି
ଯିବ ମନରୁ ପାଶୋରିରେ । ୫ ।