(ଗୋପାଳକୃଷ୍ଣ— ରାଗ ନାଦରାମକେରୀ, ତାଳ ଏକତାଳି)
କିପରି ମଧୁର ଘେନ ରେ ମାନସ
ଶ୍ରୀରାଧାଗୋବିନ୍ଦ ପ୍ରଣୟ ବିଳାସ
କଥା ରସ ଆସ୍ୱାଦନ । ଘୋଷା ।
ଶୀତକରାମୃତ ସ୍ୱାଦୁ ଉନ୍ନତକୁ
ଅବନତ କରି ପାଦେ
ହରିପୁରର ସୁଧାର ଦୁର୍ଲ୍ଲକ୍ଷକ
ହୋଇଛି ଯେ ପ୍ରତିପାଦେ । ୧ ।
ସ୍ପରଶିଲାକ୍ଷଣି ରସନାରେ
ବର୍ଣ୍ଣାବଳୀରୁ ଚାରି କି ପାଞ୍ଚ
କଣ୍ଠ ଗଦ ଗଦ ହୋଇ କି ସୁଖରେ
ତନୁ ହେଉଛି ରୋମାଞ୍ଚ । ୨ ।
ଈକ୍ଷଣରୁ ଆନନ୍ଦାଶ୍ରୁ ବହିବାର
ବିରାମ ନୋହେ ହେ ଆଉ ।
ପ୍ରାଣେଶ୍ୱରୀ ପ୍ରାଣନାଥଙ୍କ ସ୍ୱରୂପ
ହୃଦରୁ ଯାଇକି ଆଉ । ୩ ।
ସ୍ୱେଦ କମ୍ପ ପୁରିଯାଇ ଏଣେ ଅଙ୍ଗ
ଶ୍ରୀଗୁରୁ ଦତ୍ତ ଦେହରେ
ନିଯୋଜନା ହୋଇବାର ଭାବନାରେ
ତେଣେ ସ୍ୱାମିନୀ ସେବାରେ । ୪ ।
କୋଟିଏ ଜନ୍ମରେ ମିଳିବ ନାହିଁଟି
ପ୍ରଣୟ ଭକ୍ତି ସମ୍ଭୁତ
ସାତ୍ତ୍ୱିକ ନବ ରତନ ଚିନ୍ତାମଣି
ଗୋପାଳକୃଷ୍ଣ କଥିତ । ୫ ।