(ଗୋପାଳକୃଷ୍ଣ— ରାଗ ତୋଡ଼ି, ତାଳ ଏକତାଳି)
କେଣେ ଆସିଲୁ ମନ ରହି ନ ଯାଇ
ସମୟ ବଳିଯିବ ହେଲୁ କି ବାଇ । ଘୋଷା ।
ଗୋଷ୍ଠାଚଳ ଚନ୍ଦ୍ରମା ଶ୍ରୀ ବୃଷଭାନୁ ଜେମା
ପଦାରବିନ୍ଦ ସେବା ତୁ ଛାଡ଼ିଦେଇ । ୧ ।
ନିଭୃତ କୁଞ୍ଜରେ ତ ଅଳି କରିବେ ରୁତ
ଡାକି କଖ୍ଖଟୀ ଏବେ ଦେବ ଉଠାଇ । ୨ ।
ହୋଇଲେ ଅପହୁଡ଼ ଧରି କାଞ୍ଚୀ ପାହୁଡ଼
ସ୍ୱାମିନୀ ଆଗେ ଯାନ୍ତୁ ପଥ କଢ଼ାଇ । ୩ ।
ସୂର୍ଯ୍ୟ ପୂଜା ବେଳରେ ସ୍ୱାମିନୀ ଅଞ୍ଜଳିରେ
ବେଗେ ଅର୍ଘ୍ୟ ନୀରେ ଦିଅନ୍ତୁ ବଢ଼ାଇ । ୪ ।
ନନ୍ଦପୁରକୁ ବିଜେ କଲେ ଗହଣେ ତୁ ଯେ
ଥାଇ ପ୍ରାଙ୍ଗଣେ ପଦ ଦିଅନ୍ତୁ ଧୋଇ । ୫ ।
ନାଗେଶ୍ୱର କୁଞ୍ଜରେ ଶ୍ରୀ ରତନ ଦୋଳାରେ
ବିଜେକଲୁ ତୁ ଦେଖନ୍ତୁ ପହଞ୍ଚାଇ । ୬ ।
ସାରି ଜଳଲୀଳାକୁ ବାସ ଲାଗି ହେବାକୁ
ବସ୍ତ୍ରାଚରଣ କରନ୍ତୁ ପରା ଥାଇ । ୭ ।
ସ୍ୱେଶ୍ୱରୀ ତୋର ହସ୍ତେ ବଂଶୀଦେଲେ ଗୁପତେ
ଯତନେ ରଖିଥାନ୍ତୁ ପରା ଲୁଚାଇ । ୮ ।
ଶ୍ରୀମତୀ ଗୁମାନରେ ଲଳିତାଙ୍କ ପଦରେ
ଜଣାନ୍ତୁ ଜଣାଣ ଶ୍ରୀ ଗୋବିନ୍ଦଙ୍କ ପାଇଁ । ୯ ।
ପ୍ରାଣନାଥ ଛାମୁକୁ ବିଜେକଲା କାଳକୁ
ଲୋଡ଼ିବେ ବେଗେ ଏବେ ଯାଅ ପଳାଇ । ୧୦ ।
କେତେ ପ୍ରହେଳି ଗାନ ଆହା ରାସ ନର୍ତ୍ତନ
ଶ୍ରମ ନାଶିବୁ ଫୁଲପଙ୍ଖା ପକାଇ । ୧୧ ।
ନାଗରେନ୍ଦ୍ର ଛାମୁରୁ ବୃନ୍ଦା ଆସୁ ଦୂରରୁ
ସ୍ୱେଶ୍ୱରୀଙ୍କି ରହରେ ଦେବୁ ଭେଟାଇ । ୧୨ ।
ନାରୀ ଶିର ଭୂଷାଙ୍କୁ ନାଗର ମୁକୁଟଙ୍କୁ
ମୂରୁଛିଲୁ କିପରି ତୁ ନ ଲୋଭାଇ । ୧୩ ।
ମଧୁପାନ ଉତ୍ତାରେ ଜଗିଥାନ୍ତୁ ଲାଗରେ
ପୁଧା ସଂଳାପ ଶୁଣି ହସିଲା ହୋଇ । ୧୪ ।
ନିକୁଞ୍ଜ ପ୍ରାଙ୍ଗଣରେ ଚନ୍ଦ୍ରମା କିରଣରେ
ପ୍ରହେଳୀ କଉତୁକ ଶୁଣିଲୁ ନାହିଁ । ୧୫ ।
ପଶାଖେଳ ବେଳରେ ସ୍ୱାମିନୀ ନ ବସିଲେ
ବଳେ ଲଳିତା ଦେବେ ଧରି ବସାଇ । ୧୬ ।
ଗୋପାଳକୃଷ୍ଣ ଭଣେ ପ୍ରାଣକୁ ତୋ ଗୃହେ
ନିଅ ଭାବନା ଦେହ ଭିତରେ ଲାଇ । ୧୭ ।