(ବନମାଳୀ— ରାଗ ଖଣ୍ଡ ବଙ୍ଗଳାଶ୍ରୀ, ତାଳ ଏକତାଳି)
ଚକାଡୋଳା ଚିକ୍କଣ କାଳିଆ ହେ
ବକାରି ମୋ କଥା ଶୁଣ
ଠକାଠକି ଖଣ୍ଟ ଚଳିବ ନାହିଁଟି
ପକାଇ କହୁଛି ରାଣ । ଘୋଷା ।
ଢକ୍କା ବାଜୁଅଛି ଚଉଦ ବ୍ରହ୍ମାଣ୍ଡେ
ତୁମ୍ଭର ଯେତେକ ଗୁଣ
ପକ୍କା ଜଣେ ବୋଲି ଆଗୁଁ ଶୁଣିଥିଲି
ଡକାଇତରେ ଆପଣ । ୧ ।
କକା ରଥେ ବସି ପକାଇଲ ଧ୍ୱଂସି
ସ୍ୱମାତୁଳ କଂସରାଣ
ହକାରି ଥିଲା ସେ ମନେ କୂଟ ପାଞ୍ଚି
ଶୁଝିଦେଲ ପିତୃଋଣ । ୨ ।
ଅକାମନା ଭକ୍ତି କରି ଗୋପ ଗୋଈ
ଚରଣେ ଗଲେ ଶରଣ
ବକା ଛଳେ କେ ବା ରସ ରହସ୍ୟରେ
କଲେ ନିତି ସୁମରଣ । ୩ ।
ଅକାଳିଆ ଦାସ ବନମାଳୀ ପାଶ
ଛଡ଼ା ହେଲେ ଏକ କ୍ଷଣ
ତକାଇବି ନାହିଁ ନିଶ୍ଚେଁ ଗାଳି ଦେବି
ଯା ଇଚ୍ଛା ତାହା ବୋଲିଣ । ୪ ।