(ହରିବନ୍ଧୁ— ରାଗ ଭାଟିଆରୀ, ତାଳ ଝୁଲା)
ଆସ ବାବୁ ଗୋଷ୍ଠାଚଳ ଚନ୍ଦ୍ରମା ମୋହର ରେ
କୋଳେ ଧରି ଚୁମ୍ବ ଦେବି ଶ୍ରୀ ମୁଖେ ତୋହର ରେ । ଘୋଷା ।
କାହିଁକି କରୁ ରୋଦନ କି ନାହିଁ ମୋର ସଦନ
ଚିନ୍ତା ହଜା ଚିନ୍ତାମଣି ରତନର ହାର ରେ । ୧ ।
କ୍ଷଣେ ତୁନି ହୁଅ ଧନ କରାଇବି ସ୍ତନ୍ୟ ପାନ
ମ୍ଳାନ ନ କର ବଦନ ଦେବି କ୍ଷୀର ସର ରେ । ୨ ।
ଭାଇ ବଳରାମ ସଙ୍ଗେ ନର୍ତ୍ତନ କରରେ ରଙ୍ଗେ
ତୋ ନର୍ତ୍ତନ ଦେଖି ନେତ୍ର କରିବି ସୁଫଳ ରେ । ୩ ।
ଶ୍ରୀ ନାରାୟଣ ସେବାର ଫଳଟି ତୁହି ମୋହର
ଠୂଳ ହୋଇ ଲଭ୍ୟ ହେଲୁ ମୋ ଶ୍ୟାମ ସୁନ୍ଦର ରେ । ୪ ।
ତିଳାର୍ଦ୍ଧେ ହେଲେ ଅନ୍ତର ସ୍ମରୁ ନାହିଁ କୃତ୍ୟ ମୋର
ଦଶ ଦିଶ ଯାକ ମୋତେ ଦିଶଇ ଅନ୍ଧାର ରେ । ୫ ।
ହେଳାରେ ମୁ ଥିଲେ ରହି ଖେଳାରେ ଗୋପୀଏ ନେଇଁ
ଭୋଳାରେ ଲୁଚାଇଥାନ୍ତି ନ କହିଣ ଗିର ରେ । ୬ ।
କୃଷ୍ଣଙ୍କୁ ପ୍ରବୋଧି ଧୀରେ ଯଶୋଦା ଦଧି ମନ୍ଥିଲେ
ଭାବେ ହରିବନ୍ଧୁ ମଗ୍ନ ହୋଇ କହିବାର ରେ । ୭ ।