(କବିସୂର୍ଯ୍ୟ— ରାଗ ଗୁଜ୍ଜରୀ, ତାଳ ତ୍ରିପଟା)
ରାଧେ ଅନଙ୍ଗ ରଙ୍ଗ ରଣକୁ ଆଜ ସାଜରେ
ରାଜବଦନ ମୋଜ ସଖୀ ସମାଜରେ
ମନୁ ଲାଜ ତେଜ ହାଜର କରି
ତାଜ ଧରି ବିରାଜ ଆଜରେ । ଘୋଷା ।
ମଞ୍ଜୁଳତର କୁଞ୍ଜନିଳୟ ମଣ୍ଡ ଆଦରେ
କଞ୍ଜ କୁସୁମ ଗଞ୍ଜନ କମନୀୟ ପାଦରେ
ଅଞ୍ଜନ ରୁଚିପୁଞ୍ଜ ବିହଦ ପଞ୍ଜରନିଭ
କୁଞ୍ଜରେନ୍ଦ୍ର ରଞ୍ଜନଗୁଣ ଗର୍ବିତ ମତ ନିର୍ବିବାଦରେ । ୧ ।
କୁନ୍ଦ ସଦୃଶ ସୁନ୍ଦରତର ମନ୍ଦହାସିରେ
ଶ୍ରୀଚନ୍ଦନ ଘନସାର ସକଳ ବୃନ୍ଦା ବାସରେ
ନନ୍ଦନିଳୟ ଚନ୍ଦ୍ରମୁଖ ପସନ୍ଦ ସୁଅରବିନ୍ଦ
ସୂନ ନିର୍ଗତ ମକରନ୍ଦର ହୁଅ ଯା ପିପାସୀ ରେ । ୨ ।
ମୁଞ୍ଚ ସୁଦନ୍ତି ରଞ୍ଜନ ନିଶୀ ରଚ ଖେଳରେ
ଆକୁଞ୍ଚିତ ଭୂରୁଭଙ୍ଗୀଜିତ ବିରଚ କୁଳରେ
ଚଞ୍ଚଳ ନୟନାଞ୍ଚଳ ମିଶା ସଞ୍ଚିତ ମଦ ଚଞ୍ଚରୀକ
ସଞ୍ଚରୁ ନବ କାଞ୍ଚନନିଭ ଚାରୁ ଚେଳରେ । ୩ ।
ଶାନ୍ତ ରସ ପିଚିଣ୍ଡିଳ ମତି ମନ୍ତ୍ରପାଳିରେ
ସୀମନ୍ତ ମଣି ସୁକୁନ୍ତଳ ମତି ତୁଟି ଆଳିରେ
ଦନ୍ତକ ତୃଣବନ୍ତ କରୁ ନିରନ୍ତର ସେ ଦୁରନ୍ତ
କାମକୁନ୍ତ ସଦୃଶ ପାଣିରୁହ ନିତାନ୍ତ କେଳିରେ । ୪ ।
ବାରଣଗତି ହାରରେ କୁଚଭାର ମଣ୍ଡରେ
ନିକାଲ ମୁଦିରବାରତନୁରୁ ମାର ଦଣ୍ଡରେ
ଆରକତ ସୁସାରସ ବାର ବାର ବିଜୟୀ ସାରପଦ
ଦ୍ୱନ୍ଦ୍ୱକୁ ଦ୍ରବି ବନ୍ଦଇ କବି ମାରତଣ୍ଡରେ । ୫ ।