(ଯଦୁମଣି— ରାଗ ମାଳଗୁଜ୍ଜରୀ, ତାଳ ଆଠତାଳି)
ସାଗରସୁତା ବର ନାଗର ଅରି ଧର
ଆଗରେ ମାଗ ବର ମାନସରେ
ନାଗର ଜାଳ ହର ତ୍ୟାଗର ନରବର
ରାଗରେ ଆଗସରି ଯା ରସରେ । ଘୋଷା ।
ଶରଣ ଜନ ଦୁଃଖହରଣ କର୍ତ୍ତା ସୁଖ
ଭରଣଦ ଶ୍ରୀମୁଖ ସାରସରେ
କ୍ଷରଣ କୃପା ସୁଧା ବାରଣବର ବାଧା
କାରଣ ଜଣା ତାର ପାରଶ୍ୱରେ । ୧ ।
ବୃନ୍ଦାରକ ବନ୍ଦନ ବୃନ୍ଦାରଣ୍ୟ ମଦନ
ଚନ୍ଦ୍ର ନନ୍ଦନନ୍ଦନ କୁଞ୍ଜେଶରେ
ବନ୍ଦ ଅନିଶେ ପଦ୍ମ ପଦ ଦ୍ୱନ୍ଦ ଆନନ୍ଦ
ଲଭିବୁ ପଦ୍ମ ସଦ୍ମ ଅବଶ୍ୟରେ । ୨ ।
ଧରିତ୍ରୀ ଧର ଧର ହରିଣୀ କଷ୍ଟ ହର
ଚରିତ ଗାନ କର ସରସରେ
କ୍ଷରି ସୁରସରିତ ପରିତ୍ରାଣ ଦାନିତ୍ୟ
ଯେ ପଦୁ ତଥି ହୁଅ ଅଳୀଶରେ । ୩ ।
ଶମନ ତମ କମ ହେବ ତୁଟିବ ଭ୍ରମ
ତମ ଗ୍ରାମ ବର୍ଜି ତୁ ହରଷରେ
ରମଣୀୟ ଶ୍ରୀନାମ ଭଜନେ ହୁଅ କ୍ଷମ
ଶ୍ରମ ଜଞ୍ଜାଳେ ଲବେ ନ ରସରେ । ୪ ।
ଅଣିମାଦି ଶ୍ରୀ ସୁଖ ପଶିବା ମଣିମାଙ୍କ
ଭୃତ୍ୟରେ ଗଣି ହୁଅ ଅନିଶରେ
ଭଣି ତା ଯଦୁମଣି ବାଣୀ ଆନ ନ ମଣି
ବଣିଜ କର ପଦ ସାରସରେ । ୫ ।