(ଭୃଙ୍ଗବର ରାୟ— ରାଗ ମଙ୍ଗଳ ଗୁଜ୍ଜରୀ, ତାଳ ଖେମଟା)
ଆସେ କି ରଙ୍ଗେ ଢଳି ରସ ରଙ୍ଗିନୀ ରେ
ହୁଅନ୍ତା କି ଏ ମୋ ପ୍ରାଣ ସଙ୍ଗିନୀ ରେ । ଘୋଷା ।
ସେ ନବରଙ୍ଗିନୀ ବର କୁନ୍ଦନ ଅଙ୍ଗିନୀ
ଯୋଗେଶ ଯୋଗ ଭଙ୍ଗିନୀ ଚାରୁ ଭ୍ରୂଭଙ୍ଗିନୀ । ୧ ।
ବାଳାର ଚାତୁର୍ଯ୍ୟ ଭଙ୍ଗୀ କନ୍ଦର୍ପ କତୁରୀ
ସିଦ୍ଧ ବ୍ରହ୍ମଚାରୀ ଧୈର୍ଯ୍ୟ ଦେବ ତ କତୁରି । ୨ ।
ଅନୁକ୍ଷଣେ ତା ତୀକ୍ଷଣ ଈକ୍ଷଣ ଅଞ୍ଚଳ
ବନୁ ବଣା ଏଣୀ ଚାହାଣୀରୁ ତ ଚଞ୍ଚଳ । ୩ ।
ଲାବଣ୍ୟ ରସନିଧିର ଭାବ ଚମତ୍କାର
ବିଲୋକନେ ଅଙ୍ଗେ ଜନ୍ମେ ମଦନ ବିକାର । ୪ ।
ପ୍ରିୟସଖି କରେ କର ଭାର ଦେଇ ରଙ୍ଗେ
କି କଥା ହୁଅଇ ସ୍ମିତ ହାସେ କି ପ୍ରସଙ୍ଗେ । ୫ ।
ଭଲା ସୁଯୋଗରେ ଭେଟ ପଡ଼ିଛି ଛଇଳୀ
କରନ୍ତି କି ତାକୁ ମୋର ଗଳା ସୁନାମାଳି । ୬ ।
କହେ ଭୃଙ୍ଗବର କୁଞ୍ଜବିହାରୀ କେଶରୀ
ରସିକ ରାଜ୍ୟେ ମୋ ତୁଲେ ହୁଅନ୍ତା କେ ସରି । ୭ ।