(କବିସୂର୍ଯ୍ୟ— ରାଗ ନଟ, ତାଳ ଏକତାଳି)
ଫୁଲଶରେ ନ ଯା ମୋତେ ସୁକୁମାରୀ ମାରି ରେ । ଘୋଷା ।
ଫେଡ଼ି କହୁଛି ମୁଁ ସତେ ଘେନ ମୋ ବିନୟ ଚିତ୍ତେ
ବଚନେ ନ ପାରି ତୋତେ ରହିଲି ମୁଁ ହାରି ରେ । ୧ ।
ଫିଟାଇ ସଜନୀ ମାନ ଗ୍ରନ୍ଥୀକି ରାମାରତନ
ମୋତେ ଏ ବିପଦୁଁ ବେଗେ ନିଅ ତୁ ଉଦ୍ଧାରି ରେ । ୨ ।
ଫନ୍ଦା କରିଛି ମୁଁ ତୋତେ ନାହିଁ ତୋ ବିନା ଜଗତେ
ମୋତେ କାମ ପାରାବାରୁ କରିବାକୁ ପାରି ରେ । ୩ ।
ଫୁଟାଇ ନ ଦେଉ ତମ ବାଣୀରେ ମୋର ମରମ
ଦେଖାଅ ସଖୀକି ବାରେ ଉପାୟ ବିଚାରି ରେ । ୪ ।
ଫରମାସ ଆଜି ବେଶେ ଶ୍ରୀ ହରିଚନ୍ଦନ ଭାଷେ
ଶରଣ କେ ଅଛି ମୋର ବିନା ରେ ତୋହରି ରେ । ୫ ।