(ବେଣୁଧର— ରାଗ ଖଣ୍ଡ ବଙ୍ଗଳାଶ୍ରୀ, ତାଳ ପହପଟ)
ଜୟ ହେ ଜୟ ରାଧା ଶ୍ୟାମସୁନ୍ଦର ମୂର୍ତ୍ତି ହେ
ଶ୍ରୀ ବୃନ୍ଦା କାନନ ପ୍ରେମ ଦମ୍ପତି । ଘୋଷା ।
କଷିତ ତପତ କାଞ୍ଚନ ବରନୀ
ନବ ଜଳଧର ଶ୍ୟାମଳ କାନ୍ତି
ବ୍ରଜବାସୀଙ୍କର ନୟନ ରଞ୍ଜନ
ଭକ୍ତମାନଙ୍କର ହୃଦ ସମ୍ପତ୍ତି ।
ଅଗତି ଗତି ରାଇ ଶ୍ରୀପତି
ଗୋଲକ ଶୋଭା ମଣ୍ଡିଲ ଧରିତ୍ରୀ । ୧ ।
ଶିରେ ଶିଖିପୁଚ୍ଛ ସୁମଞ୍ଜୁଳ ବେଣୀ
ଗଳେ ବନମାଳ ଶ୍ରୀ ବୈଜୟନ୍ତୀ
ନୀଳ ପୀତ ପଟ ଦିଶେ ଝଟ ଝଟ
ଅଧରେ ମୋହନ ମୁରଲୀ ଗୀତି ।
ଯୁଗଳ ଛାତି ଦର୍ଶନେ ଯତି
ଆନନ୍ଦ ସାଗରେ ନିମଜ୍ଜି ଯାନ୍ତି । ୨ ।
କାଳିନ୍ଦୀର କୂଳେ କେଳି ନୀପ ମୂଳେ
ବିଜୟେ ବେଷ୍ଟିତା ବ୍ରଜ ଯୁବତୀ
ଯୁଗଳ ଚରଣ ଛନ୍ଦିବା ମାଧୁରୀ
ଆହା କି ସୁନ୍ଦର ମଧୁର ଗତି ।
ସଖୀଙ୍କ ପ୍ରତି ମଞ୍ଜୁ ଭାରତୀ
ଭାଷିବାର ଆହା କୋମଳ ଅତି । ୩ ।
ଯେ ଯାହାର ସେବା ବିଧାନେ ଖଟିବା
କି ଅପୂର୍ବ ଭାବ ହୃଦେ ଆଣନ୍ତି
ମଞ୍ଜରୀ ନିକର ମଧ୍ୟେ ବେଣୁଧର
ସେବିବ କି ସତେ କରି ବିନତି ।
ଶ୍ରୀ ଗୁରୁ ଉକ୍ତି ମାନସେ ଚିନ୍ତି
ଲଭିବ କି ଅନ୍ତେ ବ୍ରଜ ବିଭୂତି । ୪ ।