(ବେଣୁଧର— ରାଗ ଶ୍ରୀ, ତାଳ ତ୍ରିପଟା)
କହ କି ଉପାୟ ଆଉ ରେ ସଙ୍ଗିନୀ
କହ କି ଉପାୟ ଆଉ
ଦେଖିଲା ବେଳୁ ସେ ମୋହନ ମୂରତି
ମଦନ ଦେଲାଣି ଦାଉ । ଘୋଷା ।
କୁଳଶୀଳ ଲାଜ ମହତ ଆବର
ଜାତି ପଛକେ ମୋ ଯାଉ
ମୁଁ ଯେ ମୂରୁଛିଲେ ନେତ୍ର ନ ମୂର୍ଚ୍ଛଇ
ସେ ମୋ ମନକୁ ମଜ୍ଜାଉ । ୧ ।
ମୋ ମନ ତ ତହିଁ ବୁଡ଼ି ରହିଲାଣି
ଥରେ ଅନାଉଁ ଅନାଉଁ
ଅପକୀରତି ଶୋଚନା ମୋ ନାହିଁ
ତୁ କିମ୍ପା ମୋତେ ଭଙ୍ଗାଉ । ୨ ।
ତ୍ରିଭଙ୍ଗିମା ଠାଣି ବଙ୍କିମା ଚାହାଣୀ
ଅଙ୍ଗ ଦିଶେ ଦାଉ ଦାଉ
ଛବି ନଟବର ନବୀନ ସୁନ୍ଦର
ମୋ ଗଳେ ଭୁଜ ବେଢ଼ାଉ । ୩ ।
କୋଟି କାମ ଶିରୀ ଯା ବିଗ୍ରହେ ପୂରି
ତା ପ୍ରୀତିରେ ଦିନ ଯାଉ
ବେଣୁଧର ଭାଷି ହେବି ତାଙ୍କ ଦାସୀ
ପିଣ୍ଡେ ପ୍ରାଣ ଥାଉଁ ଥାଉଁ । ୪ ।