(ବୀରବିକ୍ରମ ଦେବ— ରାଗ କାନଡ଼ଗୌଡ଼ା, ତାଳ ତ୍ରିପଟା)
କୁଳଟାପବାଦ ମୋର ଲଲାଟରେ କାହିଁକି । ଘୋଷା ।
ସପସରା ହୋଇ କରି ଭୋଜରାଜାର ନଗରୀ
ଯାଉ ନାହିଁ କେଉଁ ନାରୀ ବିକିବାକୁ ଦହିକି । ୧ ।
କୋଟି କଳାନିଧି ଓଜ ଦଳା ବ୍ରଜ ଯୁବରାଜ
ବଦନ ରମା ସଦନ ନ ଚାହୁଁଛି କେହିକି । ୨ ।
ବରଜର ସୀମନ୍ତିନୀ ବାରିଜ ବନ୍ଧୁ ନନ୍ଦିନୀ
ଅମ୍ଭ ଆନୟନେ କୁମ୍ଭ ନ ଯାଏ କେ ବୋହିକି । ୩ ।
ସୁମନସ ଆହରଣ କୃତେ କାହାର ଚରଣ
କରୁ ନାହିଁ ଆଲିଙ୍ଗନ କୁଞ୍ଜବନ ମହୀକି । ୪ ।
ଖେଦ ବଶରେ କିଶୋରୀ ଭରି ନୟନରେ ବାରି
ଭାଲ ଦେଶେ କର ମାରି କହୁଛନ୍ତି ସହୀକି । ୫ ।