(ବୀରବିକ୍ରମ ଦେବ— ରାଗ ପଟ୍ଟମଞ୍ଜରୀ, ତାଳ ଯତି)
ମୋହନ ମୁରଲୀ ନାଦ ନୁହେଁ ସହି ମା
ଶୁଣିଲା ମାତ୍ରକେ ହୃଦ ହୁଏ ଦହି ମା । ଘୋଷା ।
ଶାଶୁ ନଣନ୍ଦ ଗର୍ଜ୍ଜନ ଥିଲେ ହେଲେ ଗୁରୁଜନ
ନ ଗଲେ ଯମୁନା ତଟ ନୁହେ ରହି ମା । ୧ ।
ଛଡ଼ାଇ ମୋ ପତିବ୍ରତ କରାଇ ଅଣ ଆୟତ୍ତ
ପଞ୍ଚଶର ସ୍ମର ବିନ୍ଧେ ତାହି ତାହି ମା । ୨ ।
ବ୍ରଜହାଟ ବାଟ ଗୋଟା ଶୁଭିଲା ମୋହରି ହଟା
ତଥାପି କୁଞ୍ଜକୁ ଧାଏଁ ବାଇ ହୋଇ ମା । ୩ ।
ଶୁଣିଲେ ଯେଉଁ ଯୁବତୀ ରଖି ପାରୁଥିବ ଧୃତି
ତାକୁ ପଚାରି ଉପାୟ ଦିଅ କହି ମା । ୪ ।
ଭାଷେ ଶ୍ରୀ ବୀରବିକ୍ରମ ଦେବ ଯୁବରାଜ ଶ୍ୟାମ
ପ୍ରେମଟି ଅତି ବିଷମ ହେଲା ସହି ମା । ୫ ।