(ବୀରବିକ୍ରମ ଦେବ— ରାଗ ତୋଡ଼ିପରଜ, ତାଳ ଆଦିତାଳ)
ନବୀନା ବହନା ଆଉ ଗୁମାନ
ବିଅର୍ଥ ଗଲା ଏ ଦିନରେ । ଘୋଷା ।
ବେଶେ କରିବାକୁ ତୋରା ବନାଇଛି ଝରା
କୁରଙ୍ଗୀ ନୟନା ହେଲୁ ଯା ବିମନା
ବାଜି ବିରସ ପସରା । ୧ ।
ମନ୍ଦେ ହସି ନାରୀ ରାଜ ବିରାଜ ମୋ କୋଳେ
ଆରେ ବୀଣାଭାଷୀ କିଣା ଜନେ ରୋଷି
ନୋହିଁ ଚୁମ୍ବ ଗଣ୍ଡସ୍ଥଳ । ୨ ।
ବିପରୀତେ ମାତି ପୁହାଇବି ରାତି ବୋଲି
କରିଥିଲି ଆଶା ତୁଟିଲା ଭରସା
ସ୍ମର ଶରେ ଏବେ ମଲି । ୩ ।
କରଜରେ ଅବନୀକି ନ ଚିରରେ ବାଳା
ଚନ୍ଦ୍ରମା ବଦନା ନ ହୋଇ ବିମନା
ବାରେ ଚାହାଁ ଢାଳି ଡୋଳା । ୪ ।
ଖଡ଼ିଆଳ ଯୁବରାଜ ଶ୍ରୀ ବୀରବିକ୍ରମ
ବୋଲଇ ଅଧୀର ହେଲା ଚିତ୍ତ ମୋର
ବଞ୍ଚିବା କଥା ବିଷମ । ୫ ।